Por iniciativa do Grupo Provincial do Partido Popular, no último Pleno da Deputación da Coruña foi aprobada por unanimidade a moción relativa á mellora integral da estrada DP-1913 entre A Laracha e Canteiras El Pozo.
O acordo establece os seguintes compromisos que asume a Deputación Provincial:
PRIMEIRO.- Redactar, establecer as fases de actuación e executar o proxecto de mellora da estrada DP-1913 entre A Laracha e Canteiras El Pozo para ofrecer as condicións oportunas de amplitude da plataforma da calzada e de seguridade para os peóns, automóbiles e vehículos pesados nesta vía vertebradora das comunicacións rodadas para o termo municipal da Laracha.
SEGUNDO.- Executar ou financiar integramente o proxecto de humanización do tramo urbano da DP-1913, isto é, a Avenida Doutor López Astray, que abarca unha lonxitude de 545 metros entre os puntos de confluencia coa Avenida Fisterra e a rúa Santiago, sometido ás limitacións legais oportunas.
Desde o Partido Popular da Laracha celebramos a aprobación desta iniciativa proposta polo Grupo Provincial do Partido Popular porque as actuacións reclamadas son demandadas desde hai anos ante o volume de tráfico que presenta esa estrada.
A DP-1913 é a principal vía de acceso das parroquias de Coiro, Soandres e Erboedo (tamén discorre por Torás e Lestón), dirixe ó aeroporto de Alvedro, á Coruña pola terceira rolda, á A-6 e, ademais, soporta tráfico pesado ó servir de comunicacións entre os parques empresariais da Laracha, Carballo, Ledoño e Cerceda.
Para o tramo urbano da DP-1913, a Avenida López Astray, desde o Concello da Laracha xa se presentara á Deputación un proxecto valorado en 1,3 millóns de euros para converter a céntrica rúa nun lugar máis accesible e no que se optimice o equilibrio entre os peóns e os vehículos.
Tralo acordo unánime do Pleno da Deputación, que é idéntico ós tomados no Pleno do concello, desde o Partido Popular da Laracha agardamos que as actuacións se realicen á maior brevidade por tratarse de proxectos estratéxicos para a mobilidade no termo municipal.
